Борлуулалт, үзүүлэлт, инновациар нь эрэмбэлсэн дэлхийн шилдэг цахилгаан машины жагсаалтад Тесла компанийн Model Y ба 3, Geely компанийн Xingyuan болон BYD компанийн олон загвар ордог. Gartner компаниас мэдээлснээр 2026 онд дэлхий даяар 116 сая цахилгаан машин, автобус, фургон, хүнд даацын ачааны машин хэрэглэгчдийн гар дээр очих төлөвтэй байна. McKinsey компанийн хөдөлгөөнт тээврийн хэрэглэгчдийн хандлагын судалгаанд оролцогчдын 62% нь тогтвортой байдлын асуудлаас болж тээврийн хэрэгслийн сонголтоо өөрчилж байгаа гэж хариулсан бол 42% нь дараагийн машинаа цахилгаан машин болгохыг хүсэж байна гэжээ. EV (https://evmagazine.com) сэтгүүлээс дэлхийн шилдэг 10 цахилгаан машиныг дараах байдлаар тодорхойлсон байна.
10. BYD ATTO 3
Брэнд: BYD (Хятад)
Нэг удаагийн бүрэн цэнэгээр туулах тооцоолсон зай: 508 км (316 миль)
2023 онд анхны ATTO 3 гарсан. Энэ машин 7.3 секундэд 0-ээс 62 миль/цаг хүртэл хурдлах боломжтой, нэг удаагийн бүрэн цэнэгээр 260 миль зай туулах чадвартай байжээ. Энэ нь BYD компанийн e-Platform 3.0 болон 8-1 цахилгаан хөдөлгүүртэй. BYD ATTO 3 нь өндөр хурдтай цэнэглэлтээр 29 минутын дотор 30-80% хүртэл цэнэглэгддэг бөгөөд тус компанийн өөрийнх нь хөгжүүлсэн Blade Battery (ир хэлбэрийн батарей) буюу лити-төмөр-фосфатын төрлийн шинэлэг батарейн технологитой. Уг машиныг Active, Comfort болон Premium Design гэсэн 3 загвартайгаар худалдаалагдаж байна. 2026 оны 4 дүгээр сард BYD компани ATTO 3 EVO загвараа танилцуулсан бөгөөд энэ нь туулах зай болон гүйцэтгэлийг сайжруулсан машины шинэчилсэн хувилбар юм. Шинэчлэгдсэн EVO нь 25 минутын дотор 10-80% цэнэглэгдэх боломжтой.
9. Hyundai IONIQ 5
Брэнд: Hyundai (БНСУ)
Нэг удаагийн бүрэн цэнэгээр туулах тооцоолсон зай: 570 км (354 миль)
Hyundai IONIQ 5 машин нь V2L функцтэй бөгөөд энэ нь хөдөлгөөнд оролцож байхад эсвэл зогсоол дээр байхад скутер, кемпийн хэрэгсэл зэрэг цахилгаан төхөөрөмжийг чөлөөтэй ашиглах буюу цэнэглэх боломжийг олгодог. Hyundai компанийн IONIQ 5 нь 5.3 секундэд 0-ээс 62 миль/цаг хүртэл хурдлах боломжийг олгодог хэрэгсэл юм. Энэхүү машины дээд хурд нь 114 миль/цаг байдаг. Уг машиныг 2 цахилгаан мотортой бүх дугуйгаар хөтөлдөг хувилбар эсвэл нэг цахилгаан мотортой 2 дугуйгаар хөтөлдөг гэсэн хувилбараар худалдаалж байгаа бөгөөд сэлүүрийн шилжүүлэгч, автоматаар нээгддэг цахилгаан арын хаалга зэрэг ухаалаг технологиудтай. Hyundai компани нь 2026 оны сүүлээр Лас Вегаст IONIQ 5 роботаксисыг байршуулахаар Motional компанитай хамтран ажиллаж байна.
8. Volkswagen ID.4
Брэнд: Volkswagen (Герман)
Нэг удаагийн бүрэн цэнэгээр туулах тооцоолсон зай: 357-565 км (222-351 миль)
Volkswagen ID.4 бол Volkswagen компанийн анхны бүрэн цахилгаан жийп машин юм. Уг машин нь 52 кВт.ц, 77 кВт.ц, 79 кВт.ц гэсэн 3 батарейн багтаамжтай бөгөөд 5.4-9 секундийн дотор 0-ээс 60 хүртэлх хурдатгалыг үзүүлдэг. Volkswagen ID.4 нь Volkswagen компанийн хамгийн их борлуулалттай цахилгаан жийп машин бөгөөд 2025 онд дэлхий даяар 163,400 загвар зарагджээ. Энэхүү машин нь тус компанийн цахилгаан тээврийн хэрэгсэлд зориулж боловсруулсан тусгай платформ болох модульчлагдсан цахилгаан хөтлөгчтэй матриц дээр суурилсан хоёр дахь загвар юм. Энэхүү загварыг Хятад, АНУ, Европт үйлдвэрлэж, борлуулдаг боловч Volkswagen компани АНУ-д үйлдвэрлэлээ зогсоож байгаагаа зарласан.
7. Xiaomi YU7
Брэнд: Xiaomi (Хятад)
Нэг удаагийн бүрэн цэнэгээр туулах тооцоолсон зай: 835 км (518 миль)
Xiaomi YU7 загвар нь хамгийн ихдээ 690 морины хүчтэй, оргил үедээ 508 кВт чадалтай, 0-100 км/цаг хурдлах хугацаа нь 3.23 секунд, дээд хурд нь цагт 253 км. Энэ бол Xiaomi компанийн цахилгаан машины хоёр дахь загвар бөгөөд анхны жийп буюу дунд оврын машин юм. Хятадын энэ брэнд нь ухаалаг гар утас, хэрэглээний электроникийн үйлдвэрлэлээр алдартай. Xiaomi YU7 загвар нь салбартаа анх удаа олноор үйлдвэрлэгдсэн Xiaomi HyperVision Panoramic Display дэлгэцтэй бөгөөд гурвалсан Mini LED дэлгэцийг ашигладаг.
6. BYD Qin Plus
Брэнд: BYD (Хятад)
Нэг удаагийн бүрэн цэнэгээр туулах тооцоолсон зай: 795 км (494 миль)
BYD компанийн Qin Plus цахилгаан седан нь 390 кВт цахилгаан мотортой, 4 дугуйгаар хөтөлдөг, 197 морины хүчтэй, хос хөдөлгүүртэй бөгөөд 0-ээс 100 км/цаг хүртэл 7.3 секундэд хурдлах боломжтой. Энхүү загвар нь жолоодлого, тоормослох, жолооны системийг нэгтгэсэн BYD компанийн e-Platform 3.0 системд суурилагдсан. Түүнчлэн 10.1 инчийн цахилгаан эргэлдэгч мультимедиа дэлгэц, Apple ба Android CarPlay болон дуут туслах функц бүхий шинэлэг технологитой.
5. Wuling HongGuang Mini EV
Брэнд: Wuling Motors (Хятад)
Нэг удаагийн бүрэн цэнэгээр туулах тооцоолсон зай: 301 км (187 миль)
Wuling компанийн 5-р үеийн MINIEV нь гар утасны аппликейшнээр дамжуулан дэвшилтэт холболтын функцүүдийг дэмждэг. Энэхүү 4 хаалгатай, 4 суудалтай Mini EV нь цагт 101 км хурдтай, 85 кВт-ын хамгийн их хүчин чадалтай. Энэ нь Хятадын хамгийн алдартай авсаархан цахилгаан автомашины загваруудын нэг юм. Хэмжээ, боломжийн үнэ, эрчим хүчний бага хэрэглээ нь хэрэглэгчдийн анхаарлыг ихээр татдаг. 2025 оны 10 дугаар сард уг машин нэгхэн сарын дотор 61,506 ширхэг, нийт 250,000 гаруй ширхэг зарагдсан байна. Гар утасны аппликейшн ашиглан алсаас тээврийн хэрэгслийг асаах, агааржуулагчийг хянах, салоныг урьдчилан хөргөх эсвэл халаах зэрэг өргөн боломжтой. Mini EV нь 10.1 инчийн ухаалаг мэдээллийн дэлгэцтэй. Wuling компани нь SAIC Motor (50.1%), GM China (44%), Guangxi Automobile Group (5.9%) компанийн хамтарсан үйлдвэр болох SAIC-GM-Wuling Automobile компанийн эзэмшилд байдаг.
4. BYD Seagull/Dolphin Surf
Брэнд: BYD (Хятад)
Нэг удаагийн бүрэн цэнэгээр туулах тооцоолсон зай: 305 км (190 миль)
BYD компанийн Seagull (Европт Dolphin Surf гэгддэг) загвар нь худалдаанд гарснаас хойш 1 сая гаруй ширхэг борлуулагджээ. Энэхүү загвар нь цагт 0-50 км хурдатгалыг 4.9 секундэд авдаг, 30.1 кВт.ц батарейн хүчин чадалтай, 22 минутын дотор 30-80% хүртэл хурдан цэнэглэгддэг. Seagull загвар нь ухаалаг хурдны удирдлага, автомат яаралтай тоормослолт, эгнээнээс гарах туслагч, ухаалаг холын гэрлийн удирдлага зэрэг шинэлэг функцүүдтэй төдийгүй Hi BYD командын тусламжтайгаар дуут удирдлагыг ашиглан жолооны хүрднээс гараа салгахгүйгээр үндсэн функцүүдэд хандах боломжтой.
3. Tesla Model 3
Брэнд: Tesla (АНУ)
Нэг удаагийн бүрэн цэнэгээр туулах тооцоолсон зай: 534 км (332 миль)
Дэлхий даяар хамгийн алдартай цахилгаан тээврийн хэрэгслийн нэг болох Tesla компанийн Model 3 загвар нь 0-ээс 60 миль/цаг хүртэл 6.2 секундэд хурдлах боломжтой. 2017 онд анх танилцуулагдсанаас хойш АНУ болон Их Британид хамгийн их борлуулалттай жагсаалтыг тогтмол тэргүүлж ирсэн. Энэхүү загварыг Premium болон Performance гэсэн загвараар худалдаалж байна. Performance загвар нь 163 миль/цаг хүртэл дээд хурдтай бөгөөд 2.9 секундэд 0-ээс 60 миль/цаг хүртэл хурдлах боломжтой. Tesla компанийн Model 3 загвар нь хэрэглэгчдэд тээврийн хэрэгслийг автоматаар түгжих, онгойлгох боломжийг олгодог утасны товчлуурын функцтэй. Түүнчлэн Tesla аппликейшнг ашиглан машины доторх агаарыг хянах, салоныг хөргөх эсвэл халаах боломжтой. Энэхүү машин нь ослоос урьдчилан сэргийлэхэд программ хангамж болон гадаад камерыг ашигладаг бөгөөд эгнээнээс гарахад туслах, урд талын мөргөлдөөнийг анхааруулах зэрэг аюулгүй байдал, ослоос урьдчилан сэргийлэх олон функцтэй.
2. Geely Xingyuan
Брэнд: Geely (Хятад)
Нэг удаагийн бүрэн цэнэгээр туулах тооцоолсон зай: 410 км (255 миль)
Уг загвар нь нэг удаагийн бүрэн цэнэглэлтээр 410 км зай туулах чадвартай. Geely Xingyuan загварнь дэвшилтэт 11-in-1 ухаалаг цахилгаан мотор, бие даасан түдгэлзүүлэлтийн систем, 540° тунгалаг явах эд анги, ONEBOX нэгдсэн тоормосны систем, Flyme Auto Smart System, 8.8 инчийн HD багажны самбар, 14.6 инчийн HD мэдээллийн дэлгэц бүхий хос дэлгэцтэй. Автомашины технологийн нэгэн адил уг машин нь хурдны хяналт, автомат ослын тоормос, эгнээнээс гарахад анхааруулах системтэй. Энэхүү машиныг Geely EX2 болон Geome Xingyuan гэж нэрлэдэг. Geely Xingyuan загварыг 2025 онд дараалсан 7 сарын хугацаанд сард 40,000-аас дээш борлуулсан бөгөөд нийт борлуулалт нь 530,000 ширхгийг давсан. Geely компани 2025 онд өндөр борлуулалттай байж, дэлхий даяарх борлуулалт 3 саяд хүрсэн нь өмнөх оны мөн үеэс 39%-иар өссөн үзүүлэлт юм.
1. Tesla Model Y
Брэнд: Tesla (АНУ)
Нэг удаагийн бүрэн цэнэгээр туулах тооцоолсон зай: 616 км (383 миль)
Tesla компанийн Model Y загвар нь 2019 онд анх танилцуулагдсанаас хойш дэлхийн хамгийн алдартай цахилгаан тээврийн хэрэгслийн нэг байсаар ирсэн. Model 3 болон Model Y загваруудын хооронд Tesla компани 1,600,767 тээврийн хэрэгсэл үйлдвэрлэж, 2025 онд 1,585,279 ширхэгийг зах зээлд нийлүүлжээ. Model Y загвар нь Tesla Supercharger дээр 15 минутад 173 миль хүртэл цэнэглэгдэх боломжтой бөгөөд энэ нь дэлхий даяар 80,000 гаруй нь байдаг. Энэ машин нь Premium болон Performance загвартай. Model Y Performance загвар нь цагт 155 миль хүртэл, 3.3 секундэд 0-60 миль хүртэл хурдлах боломжтой. Model Y загвар нь өндөр нягтралтай мэдрэгчтэй дэлгэц, студийн чанартай дуу чимээтэй, Тesla Arcade дээр тоглоом тоглож, кино үзэх боломжтой. 2025 оны 12 дугаар сард танилцуулагдсан Model Y загварыг араагаа оновчтой болгох, тоормосны чирэлтийг багасгах, дугуйны өнхрөх эсэргүүцлийг сайжруулах зэргээр сайжруулжээ. Бүх дугуйгаар хөтөлдөг уг загварыг шинжээчид 4.1 секундэд 0-ээс 60 миль/цаг хүртэл хурдлах боломжтой үзэж байна.
“ЭрчимНэт: Цахилгаан тээврийн хэрэгслийн шилдэг 10 үйлдвэрлэгч” нийтлэлээс EV сэтгүүлээс тодорхойлсон Xpeng, Geely, Tesla зэрэг цахилгаан тээврийн хэрэгслийн зах зээлд ноёрхож буй дэлхийн шилдэг 10 үйлдвэрлэгчийн талаарх мэдээллийг авна уу.
Эх сурвалж: https://evmagazine.com/top10/top-10-electric-cars
