Цөмийн эрчим хүчний хэрэглээ өсөж байна
Эрчим хүчний салбарын хууль эрх зүй, бодлогод хийсэн дэлгэрэнгүй дүн шинжилгээгээр эрчим хүчний нэгдсэн сүлжээний тогтвортой байдлын шаардлага, аж үйлдвэрийн нүүрстөрөгчийг бууруулах зорилт болон хиймэл оюунаас үүдэлтэй ачааллын огцом өсөлтөөс шалтгаалан дэлхий даяар цөмийн эрчим хүчний хэрэглээ дахин сэргэж байгааг аж.
Эрчим хүчний нэгдсэн сүлжээний тогтвортой байдлыг хангах, аж үйлдвэрийн нүүрстөрөгчийн ялгарлыг бууруулах зорилт болон дата төвүүдээс үүдэлтэй ачааллын өсөлтөөс шалтгаалан дэлхий даяар цөмийн эрчим хүчний бүтээн байгуулалт эрчимжиж байна. Олон улсын эрчим хүчний агентлаг (IEA)-ийн судалгаагаар одоогоор дэлхийн хэмжээнд 70 гаруй ГВт хүчин чадалтай цөмийн станц баригдаж байгаа нь 1990 оноос хойших хамгийн өндөр үзүүлэлт болоод байна.
Цөмийн эрчим хүчний хүчин чадлыг 2050 он гэхэд 3 дахин нэмэгдүүлэх COP28 дэлхийн тунхаглалд нэгдсэн улс орнуудын тоо 38 болж нэмэгдсэний зэрэгцээ томоохон үйлдвэрлэлийн 140 корпораци, санхүүгийн 16 байгууллага дэмжиж байна. Түүнчлэн Дэлхийн банк хөгжиж буй орнуудад атомын эрчим хүчний төслийг санхүүжүүлэх олон жилийн хоригоо цуцалсан нь бүтээн байгуулалтыг эрчимжүүлэхэд түлхэц болжээ.
Европын Холбооны хэмжээнд 2050 он гэхэд 60 ГВт том чадлын реактор, 17-53 ГВт жижиг модулийн реактор (SMR) барих суурь төлөвлөгөөтэй байгаа бол АНУ-д технологийн компаниуд дата төвүүдийг цахилгаанаар хангах зорилгоор 10 гаруй ГВт хүчин чадлын худалдааны гэрээ байгуулаад байна. Үүнтэй уялдан Бельги улс цөмийн эрчим хүчнээс татгалзах хуулиа цуцалж, Швед улс шинэ реактор барих эрх зүйн орчныг бүрдүүлжээ.
Хувьсах сэргээгдэх эрчим хүчний эх үүсвэр нэмэгдэхийн хэрээр суурь ачааллын цөмийн эрчим хүч нь системийн инерцийг хангаж, сүлжээний тэнцвэржүүлэлтийн зардлыг бууруулах чухал үүрэг гүйцэтгэж буйг системийн операторууд онцолж байна.