Төв болон Зүүн Азийн цөмийн эрчим хүчний хүчин чадал 2060 он гэхэд 407 ГВт-д хүрнэ

Олон улсын атомын энергийн агентлаг (IAEA)-ийн Reference Data Series No. 1 (RDS-1) шинэчилсэн тайланд дурдсанаар Төв болон Зүүн Азийн цөмийн эрчим хүчний хүчин чадал 2060 он гэхэд 407 ГВт-д хүрэх төлөвтэй байна. Энэ нь 2025 оны түвшнээс 3.4 дахин өссөн үзүүлэлт болохыг Asian Power онцолж, дэлхийн нийт цөмийн хүчин чадал 2060 он гэхэд хувилбараар 950 ГВт(ц/э), хамгийн багадаа 696 ГВт(ц/э) байна гэж таамаглажээ.

Дэлхийн цөмийн эрчим хүчний үйлдвэрлэл 2025 онд 1.1 хувиар өсөж 2,689.1 ТВт·ц-т хүрсэн хэдий ч цахилгааны нийт ачаалал хурдацтай өссөнөөс шалтгаалан дэлхийн нийт хэрэглээнд эзлэх хувь нь 8.4 хувь болж буурчээ. Олон улсын атомын энергийн агентлагийн Ерөнхий захирал Рафаэль Мариано Гросси цахилгаан эрчим хүчний өсөн нэмэгдэж буй эрэлтийг хангахын тулд шинэ хүчин чадлыг өргөжүүлэх, одоо ажиллаж буй станцуудын ашиглалтын хугацааг сунгах шаардлагатайг онцолж байна. Өдгөө дэлхий даяар ажиллаж буй реакторуудын гуравны хоёр нь 30-аас дээш жилийн насжилттай байгаагаас 45 хувь нь 40 гаруй жил ажиллаж байгаа ажээ. Бага оврын модульчлагдсан реактор (SMR) нь 2060 он гэхэд шинээр нэмэгдэх цөмийн хүчин чадлын өөдрөг хувилбарт 28 хувь, гутранги хувилбарт 23 хувийг эзлэх төлөвтэй байна. Бүс нутгийн хувьд авч үзвэл ийм реакторууд нь Зүүн өмнөд Ази болон Латин Америкт ирээдүйн цөмийн хүчин чадлын 40 хувийг, Хойд Америкт ойролцоогоор 60 хувийг бүрдүүлэх магадлалтай байна. 2025 онд дэлхий даяар нийт 2.8 ГВт(ц/э) хүчин чадал бүхий 7 реакторыг ашиглалтаас гаргаж, 3.0 ГВт чадалтай 3 реакторыг сүлжээнд шинээр холбож, 14.3 ГВт хүчин чадалтай 12 шинэ реакторын барилга угсралтын ажлыг эхлүүлжээ.