Польш: 1.2 ГВт·ц хүчин чадалтай хадгалах системийн төслийн санхүүжилтийг босголоо
Канадын эрчим хүч үйлдвэрлэгч Northland Power компани Польш улсад нийт 1.2 ГВт·ц хүчин чадалтай 2 хадгалах системийн төслийн санхүүжилтийг босгож дууслаа.
Канадын бие даасан эрчим хүч үйлдвэрлэгч Northland Power компани Польш улсад баригдах нийт 1.2 ГВт·ц багтаамжтай эрчим хүч хадгалах хоёр бие даасан байгууламжийн төслийн санхүүжилтийг амжилттай босгож дууссан талаар Energy-Storage.News мэдээллээ. Эдгээр төслүүд нь тус улсын хүчин чадлын зах зээлийн механизмаар олгогдсон урт хугацааны гэрээгээр баталгаажсан хөрөнгө оруулалт юм. Санхүүжилтийн бүтцийг арилжааны болон хөгжлийн банкуудын консорциумын зээл болон Northland компанийн өөрийн хөрөнгөөр бүрдүүлжээ. Төслийн барилга угсралтын ажил одоогоор үргэлжилж байгаа бөгөөд байгууламжуудыг 2028 онд ашиглалтад оруулан Польшийн эрчим хүчний нэгдсэн сүлжээнд холбохоор төлөвлөсөн байна. Ашиглалтад орсны дараа эдгээр системүүд нь сэргээгдэх эрчим хүчний өсөлтийг дэмжиж, сүлжээний тогтвортой байдлыг хангах, ачааллыг шилжүүлэх болон системийн давтамжийн тохируулга хийх үүргийг гүйцэтгэх юм. Польш улс нь хүчин чадлын зах зээлийн хүрээнд 11 ГВт гаруй хүчин чадлын гэрээг баталгаажуулснаар Европ тивд эрчим хүч хадгалалтын тэргүүлэх зах зээл болон хөгжиж байна. Системийн оператор Polskie Sieci Elektroenergetyczne компани нь томоохон хэмжээний хадгалах байгууламжуудыг нэвтрүүлснээр дамжуулах сүлжээний түгжрэлийг арилгаж, хуучирсан чулуужсан түлшний суурилагдсан хүчин чадлыг орлуулахаар зорьж байна.