Нийслэлийн дулаан хангамжийн сүлжээг шинэчлэх асуудлаар Европын Холбооны багтай санал солилцов
Улаанбаатар хотын эрчим хүч, дулаан хангамжийн салбарын төлөөллүүд Европын Холбооны баг, олон улсын болон дотоодын эрчим хүчний зөвлөхүүдтэй уулзаж, нийслэлийн эрчим хүчний шилжилт болон цаашдын хамтын ажиллагааны талаар санал солилцлоо.
Улаанбаатар хотын эрчим хүч, дулаан хангамжийн салбарын төлөөллүүд Европын Холбооны ажлын баг болон дотоод, гадаадын зөвлөхүүдтэй уулзаж, нийслэлийн эрчим хүчний шилжилт, дэд бүтцийн шинэчлэлийн асуудлаар санал солилцлоо. Уулзалтаар нийслэлийн төвлөрсөн дулаан хангамжийн сүлжээний үр ашгийг нэмэгдүүлэх, алдагдлыг бууруулах, инженерийн бүтцийн найдвартай ажиллагааг хангах чиглэлд анхаарал хандуулсан байна. iKon.MN сайтын мэдээлснээр, талууд нийслэлийн ногоон шилжилтийг одоогийн ашиглаж буй дулаан, цахилгааны дэд бүтцийг ухаалаг, үр ашигтай болгохоос эхлүүлэх шаардлагатайг онцолсон юм. Энэ хүрээнд Европын Холбоо болон олон улсын санхүүгийн түншүүдийн техникийн туршлага, хөрөнгө оруулалтыг хотын хөгжлийн бодлоготой уялдуулан үе шаттай шилжих шийдлүүдийг хэлэлцжээ. Тус уулзалтад нийслэлийн эрчим хүчний төсөл хариуцсан зохицуулагч Ч.Батзориг, Засаг даргын Ногоон хөгжил хариуцсан зөвлөх Б.Мөнгөнхишиг, Улаанбаатар дулааны сүлжээ ТӨХК-ийн Гүйцэтгэх захирал Ц.Амарсанаа, Тархмал эрчим хүчний дэд бүтэц ХХК-ийн Ерөнхий инженер В.Ганбаатар болон Европын Холбооны шинжээч Тьерри Бертуль, Венсан Вио нар оролцож, дулааны дэд бүтцийн техник-эдийн засгийн төслүүдийг хамтран хэрэгжүүлэхээр тохиролцсон байна.