Нидерланд: 400 МВт эрчим хүч хадгалах төсөлд хөрөнгө оруулна

Германы эрчим хүчний RWE компани Нидерландын Хойд Брабант мужид орших Moerdijk цахилгаан станцын талбайд 400 МВт/1,100 МВт·ц (1.1 ГВт·ц) хүчин чадалтай, үйлдвэрлэлийн түвшний аккумуляторын батарейгаар эрчим хүч хадгалах систем барихад хөрөнгө оруулах болжээ. Энэхүү төсөл нь ойролцоогоор 3 цагийн турш дээд чадлаар тасралтгүй эрчим хүч гаргах чадвартай 208 ширхэг лити-ион батарейн чингэлгээс бүрдэх ажээ. Уг байгууламж бүрэн ашиглалтад орсноор оройн оргил ачааллын цагуудад ойролцоогоор 500,000 өрхийн цахилгааны хэрэгцээг хангах хэмжээний эрчим хүчийг нийлүүлэх боломж бүрдэнэ. Батарейн хуримтлуурын систем нь TenneT оператор компанийн удирддаг Өмнөд Нидерландын цахилгаан дамжуулах сүлжээн дэх түгжрэлийг бууруулахад голчлон чиглэгдсэн байна. Станцыг зэргэлдээх 150 кВ Moerdijk-Noord дэд станцаар дамжуулан өндөр хүчдэлийн сүлжээнд шууд холбосноор сэргээгдэх эрчим хүчний илүүдэл үйлдвэрлэлийг миллисекундын дотор хүлээн авч шингээх боломжтой болно. Мөн тус байгууламж нь 795 МВт хүчин чадалтай OranjeWind далайн салхин цахилгаан станцын хувьсамтгай үйлдвэрлэлийг тэнцвэржүүлэн, сүлжээнд тогтвортой нийлүүлэх үүрэг гүйцэтгэх юм. Төслийн барилга угсралтын ажлыг ойрын саруудад эхлүүлж, 2028 оны 2 дугаар улиралд ашиглалтад оруулахаар төлөвлөж байна. RWE компанийн зүгээс сэргээгдэх эрчим хүчний тогтворгүй үйлдвэрлэлийг тэнцвэржүүлэх, сүлжээний болзошгүй саатал болон өндөр өртөгтэй хязгаарлалтуудаас урьдчилан сэргийлэхэд том чадлын уян хатан хадгалах байгууламжууд чухал үүрэгтэй болохыг онцолжээ.