Хятад: 2026 оны эхний 7 сард 75 тэрбум ам.долларын эрчим хүчний тоног төхөөрөмж экспортолжээ

Дэлхийн эрчим хүч худалдан авагчид болон сүлжээний операторууд 2026 оны эхний 7 сард Хятадын эрчим хүч хадгалах батарей, цахилгаан сүлжээний тоног төхөөрөмжид нийт 75 тэрбум ам.доллар зарцуулжээ. MarketScale байгууллагаас мэдээлснээр энэхүү дүн нь мөн хугацаанд дэлхий даяар Хятадаас нарны хавтан импортлоход зориулсан 19.4 тэрбум ам.долларын санхүүжилтээс даруй 4 дахин их байна. Бүс нутгийн хувьд Европын сүлжээний оператор, хөгжүүлэгчид 31.1 тэрбум ам.долларын тоног төхөөрөмжийг, Азийн зах зээл 22 тэрбум ам.доллар, Латин Америкийн улсууд 3.9 тэрбум ам.доллар, Африкийн орнууд 3.8 тэрбум ам.долларын импортыг тус тус хийсэн нь дэлхийн эрчим хүчний компаниуд хөрөнгө оруулалтаа зөвхөн үйлдвэрлэх эх үүсвэрээс илүүтэй сүлжээ тэнцвэржүүлэх дэд бүтэц рүү чиглүүлж байгааг илтгэж байна. Сэргээгдэх эрчим хүчний эх үүсвэрээс шалтгаалан өдрийн цагаар сүлжээнд үүсэх эрчим хүчний илүүдэл, хэлбэлзлийг удирдахын тулд хуримтлуурын систем, өндөр хүчдэлийн цахилгаан дамжуулах шугам болон автоматжуулсан дэд станцын тоног төхөөрөмжийг түлхүү суурилуулж байна. Сүлжээний найдвартай байдлыг хангах, үйлдвэрлэлийн хязгаарлалтаас сэргийлэх шаардлага нэмэгдэж буй энэ үед Хятадын үйлдвэрлэгчид сүлжээний түвшний аккумуляторын батарей болон дамжуулах тоног төхөөрөмжийн гол экспортлогч хэвээр байна.