eVinci тэг-чадлын туршилтын үеэр температурын дээд амжилт тогтоолоо

Westinghouse Electric компани өөрийн бүтээж буй eVinci бичил реакторын тэг-чадлын өндөр температурын туршилтыг амжилттай хийж, цельсийн 663 хэмд критик төлөвт хүрснийг зарлалаа. Туршилтын явцад судлаачид реакторын судал температур хамгийн өндөртөө цельсийн 1,011 хэмд хүрэх үеийн дэд критик реактив байдлын хэмжилтийг хийсэн нь NCERC байгууламжийн хувьд бүх цаг үеийн дээд амжилт болжээ.

Энэхүү туршилтыг Лос Аламосын үндэсний лаборатори болон АНУ-ын Эрчим хүчний яамны Үндэсний цөмийн аюулгүй байдлын удирдлагын газрын Үндэсний критик туршилтын судалгааны төв (NCERC), Невадагийн үндэсний аюулгүй байдлын талбайтай хамтран гүйцэтгэжээ. Туршилтаас гарсан нарийвчилсан өгөгдлийг реакторын физикийн кодыг шалгах, аналитик загварчлалыг боловсронгуй болгох, судал инженерийн ажлыг урагшлуулахад ашиглах юм. Westinghouse Electric компанийн Ерөнхийлөгч бөгөөд Гүйцэтгэх захирал Дан Самнер энэхүү туршилтыг eVinci бичил реакторыг зах зээлд арилжааны хэлбэрээр нэвтрүүлэх бодит баталгааг бий болгосон үйл явдал гэж үнэлжээ. Туршилтын үр дүнд тулгуурлан реакторын үйлдвэрлэл болон холбогдох тусгай зөвшөөрөл авах хуваарийг эцэслэн батлах аж.

eVinci бичил реактор нь 5 МВт хүртэлх цахилгаан, 15 МВт дулааны эрчим хүч үйлдвэрлэх чадалтай, дулааны хоолойгоор хөргөгддөг загвар юм. TRISO түлш ашигладаг уг төхөөрөмж нь түлш солихгүйгээр бүрэн чадлаараа 8 ба түүнээс дээш жил тасралтгүй ажиллах хүчин чадалтай бөгөөд алслагдсан бүс нутаг, батлан хамгаалах салбар, бие даасан бичил сүлжээг эрчим хүчээр хангахад зориулагдан чингэлгээр тээвэрлэх боломжтойгоор бүтээгджээ.