Эрчим хүчний үнэ нэмэхгүйн тулд төсөвт 200 тэрбум төгрөгийн татаас тусгажээ

Монгол Улсын 2026 оны төсвийн тодотголд эрчим хүчний салбарт зориулж нийт 200 тэрбум төгрөгийн татаас олгохоор тусгасан тухай Эрчим хүчний сайд Б.Найдалаа мэдээллээ. Энэхүү санхүүжилт нь хэрэглэгчдийн үнэ тарифын дарамтыг нэмэгдүүлэхгүй байх, салбарын санхүүгийн алдагдлыг хаах үндсэн зориулалттай юм.

Эрчим хүч үйлдвэрлэх бодит өртөг болон борлуулалтын тарифын зөрүүнээс үүдэлтэй алдагдлыг улсын төсвөөс нөхөн олгосноор айл өрх, аж ахуйн нэгжүүдийн цахилгааны үнийг огцом нэмэхгүйгээр системийн тогтвортой ажиллагааг хангах боломж бүрдэж байгааг онцолж байна. Уг татаас нь өвлийн их ачааллын үеийн импортын төлбөрийг төлөх болон нүүрсний уурхайнуудын өглөг, авлагын тооцоог зохицуулахад чухал үүрэг гүйцэтгэх юм. Төсвөөс татаас олгож байгаа нь инфляцын дарамтыг бууруулахад дэмжлэг болох хэдий ч урт хугацаандаа зах зээлийг өртөгт суурилсан үнэ тарифын тогтолцоонд шилжүүлэх шинэчлэлийг шат дараатай хийх шаардлага хэвээр байгааг Засгийн газар үзэж байна.