Шотланд: 350 МВт/1.4 ГВт·ц эрчим хүч хадгалалтын төсөлд 270 сая еврогийн хөрөнгө оруулна
Данийн хөрөнгө оруулалтын сангийн менежер Копенгагены дэд бүтцийн түншүүд (CIP) Шотландын баруун өмнөд хэсэгт 350 МВт/1,400 МВт·ц хүчин чадалтай аккумуляторын батарей бүхий эрчим хүч хадгалах систем барихад хөрөнгө оруулалтын эцсийн шийдвэр гаргажээ.
Данийн хөрөнгө оруулалтын сангийн менежер Копенгагены дэд бүтцийн түншүүд (CIP) Шотландын Өмнөд Эйршир дахь Kilmarnock South төсөлд 270 сая гаруй евро (303.8 сая ам.доллар)-ийн шууд хөрөнгө оруулалт хийх шийдвэр гаргалаа. Тус төсөл нь 350 МВт/1,400 МВт·ц хүчин чадалтай аккумуляторын батарей бүхий эрчим хүч хадгалах системийг барьж байгуулах зорилготой юм. Талбайн барилга угсралтын ажлыг албан ёсоор эхлүүлж, үйл ажиллагааг 2028 оны эхний улиралд эхлүүлэхээр төлөвлөжээ. Байгууламж нь Шотландын хуурай газрын болон далайн салхин цахилгаан станцуудаас илүү гарсан эрчим хүчийг шингээж, системийн ачаалалтай үед Үндэсний нэгдсэн сүлжээнд 4 цагийн лити-ион батарейн технологиор цахилгаан нийлүүлэх зориулалттай аж. Renewables Now агентлагаас мэдээлснээр, Kilmarnock South нь CIP компанийн Шотландад хэрэгжүүлж буй Coalburn 1, Coalburn 2, Devilla төслүүдийн дараах сүлжээнд холбогдсон дөрөв дэх томоохон хадгалалтын хөрөнгө юм. Тус компанийн Coalburn 1 суурилуулалт өнгөрсөн наймдугаар сард арилжааны үйл ажиллагаагаа эхлүүлсэн байна. Бүрэн ашиглалтад орсны дараа дамжуулах сүлжээний түвшний эдгээр байгууламжууд нь Шотландын дамжуулах сүлжээний бүтцийн түгжрэлийг арилгаж, сүлжээг тэнцвэржүүлэх болон уян хатан байдлыг хангах үйлчилгээ үзүүлнэ.