БНХАУ ба Казахстан улс 53.7 тэрбум юанийн сэргээгдэх эрчим хүчний төслийн гэрээ байгууллаа

БНХАУ болон Казахстан улс 8 тэрбум ам.доллар буюу 53.7 тэрбум юанийн хөрөнгө оруулалттай, 7 ГВт хүчин чадалтай нарны цахилгаан станц, хадгалах систем болон цэнэглэх төслийн гэрээг байгууллаа. Энэхүү баримт бичигт 2026 оны 9-р сард Бээжин хотноо зохион байгуулагдсан үйлчилгээний худалдааны үзэсгэлэнгийн үеэрх Хятадын олон улсын ухаалаг үйлдвэрлэл ба эрчим хүчний салбарын хөгжлийн форумын үеэр гарын үсэг зуржээ. Төслийн хүрээнд нарны болон эрчим хүч хадгалах долоон кластерийг үе шаттайгаар барьж байгуулахаар төлөвлөсөн байна. Мөн 2,500-аас 4,000 километр урттай хувийн цахилгаан дамжуулах агаарын шугам суурилуулах бөгөөд 12-оос 18 ГВт·ц хүчин чадал бүхий аккумуляторын батарейн системийг нэвтрүүлэхээр тусгажээ. Түүнчлэн аж үйлдвэрийн хэрэглэгчид, мэдээллийн төв болон харилцаа холбооны сүлжээний найдвартай байдлыг хангах цахилгаан худалдах, худалдан авах гэрээ байгуулахаар төлөвлөснийг Seetao агентлаг мэдээлэв. Төслийн техникийн болон зохицуулалтын төлөвлөгөөг Казахстаны төрийн эрх бүхий байгууллагууд, үндэсний сүлжээний оператор KEGOC, сэргээгдэх эрчим хүчний худалдан авах нэгдсэн агентлаг болон хотын захиргаатай урьдчилан хамтран боловсруулсан байна. Энэхүү санаачилгад Олон улсын академичдын шинжлэх ухаан, технологийн инновацын төв, Бээжингийн эрчим хүчний салбарын холбоо болон Казахстаны эрчим хүчний байгууллагууд оролцож байна. Талууд хээрийн судалгаа зохион байгуулах, ажлын хуваарийг батлах, хамтарсан компани болон удирдлагын төв байгуулах чиглэлээр өндөр түвшний хэлэлцээ хийжээ.