АНУ: Цахилгааны зардлыг бууруулж, сүлжээний найдвартай байдлыг сайжруулахад 5.25 тэрбум ам.долларын хөрөнгө оруулна

АНУ-ын Эрчим хүчний яамны Цахилгаан эрчим хүчний газар тус улсын 26 мужийг хамарсан цахилгаан сүлжээг шинэчлэх 31 төсөлд нийт 5.25 тэрбум ам.долларын хөрөнгө оруулах шийдвэр гаргалаа. Тус яамнаас мэдээлснээр уг санхүүжилтийн 1.9 тэрбум ам.долларыг холбооны засгийн газраас гаргаж байгаа бол үлдсэн 3.35 тэрбум ам.долларыг төсөл хэрэгжүүлэгч дамжуулах сүлжээний оператор компаниуд хамтран санхүүжүүлэх аж. Төслийн хүрээнд 1,500 гаруй миль цахилгаан дамжуулах шугамын утсыг сольж, шинэчлэхээс гадна одоо ашиглагдаж буй 21,000 миль урттай хэлхээнд сүлжээний дэвшилтэт хяналт, оновчлолын технологиудыг суурилуулахаар төлөвлөжээ. Шугамын дамжуулах чадварын динамик үзүүлэлт болон дэвшилтэт дамжуулагч утсыг нэвтрүүлснээр ачаалал ихтэй чиглэлүүдэд шинээр нэмэлт 23 ГВт дамжуулах хүчин чадлыг түргэн хугацаанд бий болгож, 100 сая орчим хэрэглэгчийн цахилгаан дамжуулах бөөний зардлыг бууруулах тооцоо гарсан байна. Хөтөлбөрт сонгогдсон American Electric Power зэрэг дамжуулах сүлжээний компаниуд өсөн нэмэгдэж буй цэвэр аж үйлдвэрийн ачааллыг хангах зорилгоор 345 кВ-ын гол шугамуудын шинэчлэлийг эхлүүлж байна. Энэхүү бодлого нь олон жил шаардагдах шинэ шугам сүлжээ барихаас илүүтэй одоо байгаа дэд бүтцийн утас болон тоноглолыг шинэчлэх замаар шинэ эх үүсвэрүүдийг хэрэглээний төвүүдтэй богино хугацаанд холбох давуу талтай юм.