АНУ: BWRX-300 бага оврын модульчлагдсан реактор барих анхны зөвшөөрлийг олголоо

АНУ-ын Цөмийн зохицуулах хороо (Nuclear Regulatory Commission) Теннесси мужийн Оак Риджийн ойролцоох Клинч Риверт баригдах BWRX-300 бага оврын модульчлагдсан реакторын барилгын ажлыг эхлүүлэх зөвшөөрлийг Tennessee Valley Authority байгууллагад албан ёсоор олгожээ. Энэ нь тус улсын хэмжээнд арилжааны зориулалттай бага оврын реактор барихад олгосон анхны зөвшөөрөл болж байна гэж World Nuclear News мэдээлэв. Төслийн аюулгүй байдлын үнэлгээ болон зохицуулалтын хяналтын шалгалтыг тус хороо 14 сарын дотор дуусгаж, анх төлөвлөсөн хугацаанаас 4 сарын өмнө шийдвэрээ гаргасан байна. GE Vernova Hitachi Nuclear Energy компанийн хөгжүүлсэн BWRX-300 реактор нь 300 МВт хүчин чадалтай, усан хөргөлттэй технологи юм. Уг төхөөрөмж нь ESBWR платформоос уламжилсан идэвхгүй аюулгүй байдлын механизмаар тоноглогдсон онцлогтой. Хэдийгээр барилгын зөвшөөрөл гарсан ч төсөл хэрэгжүүлэгч Tennessee Valley Authority байгууллага одоогоор бүтээн байгуулалтын ажлыг эхлүүлэх албан ёсны товыг эцэслэн зарлаагүй байна. Тус байгууллага шинэ технологийн анхны төсөлд учирч болох санхүүгийн эрсдэлээс хэрэглэгчдээ хамгаалах зорилгоор үйлдвэрлэлийн түншүүдтэйгээ төслийн зардлыг хуваалцах талаар хэлэлцээ хийж байна. Энэхүү бүтээн байгуулалт нь Канад улсын Darlington цөмийн байгууламжид эхлүүлсэн BWRX-300 төслийн араас залгамжлан хэрэгжиж байгаа бөгөөд цаашид Их Британи, Польш зэрэг улсад мөн ижил төстэй реакторын төслүүдийг барихаар төлөвлөж байна.