Япон: Хүчин чадал нөөцлөхийг хязгаарлав
Япон улс аккумуляторын батарей бүхий төслүүд давамгайлсан сүлжээнд холбогдох дараалалд хүчин чадал нөөцлөх явдалтай тэмцэхэд зориулан талбайн эрх баталгаажуулах шинэ дүрмийг нэвтрүүлжээ.
Япон улсын Дамжуулах сүлжээний операторуудын бүс хоорондын зохицуулах байгууллага (OCCTO) сүлжээнд холбогдох дараалалд хүчин чадал нөөцлөх явдалтай тэмцэх шинэ удирдамж баталлаа. Шинэ журмын дагуу 2026 оны 10-р сарын 1-нээс эхлэн сүлжээнд холбогдох зөвшөөрөл авсан хөгжүүлэгчид 2 сарын дотор төслийн талбайгаа хууль ёсоор эзэмшиж буйг нотлох албан ёсны баримт бичгээ бүрдүүлэх үүрэг хүлээж байгаа бөгөөд уг шаардлагыг биелүүлээгүй тохиолдолд холболтын эрхээ цуцлуулах юм. Энэхүү шинэчлэл нь дамжуулах сүлжээний чухал хүчин чадлыг эзэлж буй тодорхой бус, дамын шинжтэй төслүүдийг шүүн цэвэрлэх чиглэлээр энэ онд хэрэгжүүлж буй гурав дахь бодлогын арга хэмжээ болж байна. Японы Эдийн засаг, худалдаа, аж үйлдвэрийн яамны харьяа Дараа үеийн нэгдсэн сүлжээний ажлын хэсгээс боловсруулсан уг зохицуулалт нь бодитой хэрэгжих боломжтой төслүүдийг сүлжээнд холбох явцыг түргэсгэх зорилготой ажээ. ESS News сайтаас мэдээлснээр, 2025 оны 12-р сарын сүүлчийн байдлаар Япон улсад 172 ГВт орчим үйлдвэрлэлийн түвшний аккумуляторын батарейн хүчин чадал холболтын судалгааны шатанд, 30 ГВт нь гэрээ байгуулах шатанд гацаад байсан бол бодит байдал дээр сүлжээнд ердөө 0.64 ГВт орчим батарей холбогдоод байгаа аж. Энэхүү шинэ дүрэм нь 10-р сарын 1-нээс хойш хүлээн авсан цахилгаан үйлдвэрлэх гэрээний бүх өргөдөлд үйлчлэх бөгөөд дэмжлэгийн тариф, урамшууллын хөтөлбөрт хамрагдсан төслүүд болон гаралт нэмэгдүүлэхгүй талбайн өөрчлөлтүүд үүнээс чөлөөлөгдөнө. Түүнчлэн бүс нутгийн дамжуулах сүлжээний операторууд үндэслэлтэй шалтгаанаар хугацааг сунгах эрхтэй хэвээр байх ба бодлого тодорхойлогчид эдгээр арга хэмжээгээр дамжуулан сүлжээг тогтворжуулах нөөцүүдийг ашиглалтад оруулах хугацааг түргэсгэхээр зорьж байна.