10 трансформаторын хүчин чадлыг өргөтгөж, цахилгааны чадлыг 29 МВА-аар нэмэгдүүлжээ
Улаанбаатар хотын 2026-2027 оны инженерийн дэд бүтцийн өвөлжилтийн бэлтгэл ажил 83 хувьд хүрснийг албаныхан мэдээллээ. Өнөөдрийн байдлаар нийслэлийн дулааны эрчим хүчний ачаалал 146 хувь, цахилгаан эрчим хүч 109-117 хувь, бохирын шугам сүлжээ 109 хувийн хэт ачаалалтай ажиллаж байна.
Улаанбаатар хотын 2026-2027 оны инженерийн дэд бүтцийн өвөлжилтийн бэлтгэл ажил 83 хувьтай үргэлжилж байна. Өнөөдрийн байдлаар нийслэлийн дулааны ачаалал 146 хувь, цахилгаан эрчим хүч 109-117 хувь, бохирын шугам сүлжээ 109 хувийн хэт ачаалалтай ажиллаж байгааг iKon.MN мэдээллээ. Цахилгаан хангамжийг бэхжүүлэх хүрээнд “Улаанбаатар цахилгаан түгээх сүлжээ” ТӨХК бэлтгэлийг 100 хувь, 3,309 шугам дэд станцын засварыг 98.7 хувьтай гүйцэтгэж, 30.9 км ЦДАШ-ыг шинэчилсэн байна. Мөн өнгөрсөн өвөл хэт ачаалалтай ажилласан 35 кВ-ын 10 дэд станцын 10 трансформаторын хүчин чадлыг өргөтгөж, 2 трансформатор шинээр нэмж суурилуулснаар цахилгааны чадлыг нийт 29.2 МВА-аар нэмэгдүүлжээ. Шинэ эх үүсвэрүүдийн хувьд Тавдугаар цахилгаан станцын явц 16 орчим хувьтай байгаа бөгөөд 2028 онд ашиглалтад орсноор 100,000 айлыг цахилгаанаар, 50,000 айлыг дулаанаар хангах юм. Дамбадаржаагийн 63 МВт хүчин чадалтай дулааны станцын угсралт 70 гаруй хувьд хүрч энэ өвөл тохируулга хийгдэх ба нүүрс хөлдөхөөс сэргийлэн 350,000 тонн нүүрсийг хатааж нөөцөлжээ. Түүнчлэн Багануурын 50 МВт батарей станц ажиллаж, Хүннү хотод 50 МВт нар-батарейн цогцолбор баригдаж байгаа бол Бөөрөлжүүтийн 300 МВт-ын станцын 3 дугаар ээлжийн 150 МВт-ын өргөтгөлийн блокийг 2027 оны 12 дугаар сард ашиглалтад оруулахаар төлөвлөсөн байна.